Ямар үстэй байх нь тухайн хүний онцлог, эрүүл мэндээс ихээхэн хамаардаг. Гэхдээ арчилгаа маш чухал байр суурь эзлэх нь мэдээж. Энэ зөвлөгөөг үсээ ургуулах хүсэлтэй бүсгүйчүүддээ зориуллаа. Чацарганы залуу модны найлзуурыг хандалж, толгойн хуйхаа норго. 20 г найлзуурыг 200 гр усанд буцалгаж хөргөнө. Үүнээс гадна хурдхан шиг урт, өтгөн сайхан үстэй болохыг хүсч байвал шинэхэн чацаргана идээрэй. Эсвэл чацарганы модны навчийг цай шиг хандалж уусан ч болно. Ийм цайг зөгийн бал, элсэн чихрээр амталж өдөрт хоёр удаа хоолны дараа уувал зөөлөн, гялалзсан үстэй болно. Мөн эрүүл мэндэд таатай нөлөөлж, бие хөнгөрөн, сэргэлэн цовоо болохыг мэдэрнэ. Энэ үед хөнгөн иллэг хийвэл хуйхны цусан хангамж эрчимждэг.
Сармис нь үсний уутанцрын цусан хангамжийг нэмэгдүүлэн үс ургах, тэжээл авах нөхцлийг бүрдүүлдэг. Мөн сармисны маск нь таны үсийг хагнаас ангижруулна. Сармисны таван хумсыг авч, нүдүүрт хийж нухах ба хэрэв хуурай үстэй бол гурван халбага ургамлын тос нэм. Харин тослог бол сармисаа дангаар нь хуйханд түрхэнэ. Уг маскийг хоёр цаг тавиад үсээ бүлээн усаар сайтар угааж, ангижруулагчаар зайлна. Сармисны оронд сонгино ашиглаж болно.
Цайны нэг халбага зөгийн бал, бага зэрэг конъяк, нэг ширхэг өндөгний шарыг холиод үсний угт түрхэж, бүлээн алчуураар битүү ороо. Нэг цагийн дараа угаана.
Хоёр халбага бүлээн усан дээр мөн хэмжээний хуурай гич, нэг ширхэг өндөгний шар, нэг халбага Е амин дэм (тосон) болон ургамлын тос, хоёр халбага элсэн чихэр холино. Дараа нь үснийхээ угт бэлдмэлээ түрхэн толгойдоо гялгар уут углаж, алчуураар давхар боогоод эхний удаад 10-15 минут байлга. Учир нь гич, элсэн чихэр нь хуйхыг түлж буй мэт бага зэрэг хорсгож, халуу оргиулах тул яваандаа хугацааг нь нэмж нэг цаг болгоорой. Энэ маскыг долоо хоногт нэг удаа тавих бөгөөд бүлээн усаар шампуниар угааж, ангижруулагчаар зайлна.
Дашрамд дурдахад үсний ургалтыг түргэсгэх маскыг долоо хоногт ядаж нэг удаа, гурван сарын турш хэрэглэж байж үр дүн гарна гэдгийг анхаараарай.
0 Сэтгэгдэл:
Post a Comment